َشيْمـَـاء عـَبدُ الله

"الـــميدان "

رمــز قاله كل واحد
اللي سامع و اللي شاهد
و اللي عدى ألف شارع
و اللي أدن في الجوامع
اللي دق جرس كنيسة
و اللي غني " مصر العزيزة "
و اللي دمه سال و صحى
صــوت بيكتم فيه ألف بحــة
و اللي نادي و اللي ضحى
و اللي ماتت فيه حياة
و اللي قوى صاحبه لما مات في عينه الإنتصار
و اللي طبطب ع الدراع
و اللي شبع لما جاع
و اللي بات ع الرصيف
و اللي قلبه أبيض نضيف
و اللي رافض يبقى مصري لو في يوم يصبح ضعيف !
اللي شال ألف حــاجز
و اللي أثبت إنه مش عـاجز
اللي أول مره أشوفه
و ألمح في العيون خوفه
و أطمنه " مــا تخافش "
و اللي مات وسط الميدان
و اللي صبره كــان إيمـان
و العجوز و الشيح و أبونا
و الكلاب اللي ضربونا
و الحنان من أم شافت إبنها ميت قصادها
و الدعوة لما تشوفنا بنـطالب بحقوق ضناها
و الصلاة فـ الـــجماعة
و الأجندة و البتاعة
و البتاع و البتوع
وحنا لسه ما فيش رجوع
إترسم على وشنا إصرار يفسر كل حاجة
ياللي فاكر إني لسه برضه خايف
إنت عمى ؟ ولا لسه مُصِــر تبقى مش شايف ؟
شوف و فــتَّح
ع الورد اللي فتــَّح
في جناين مصر 

بـ قـلم \ شَيّمـَاء عَـبدُ الله